ರಾಜ್ಯ ಸರಕಾರದ ಹಲವು ಸಚಿವರ ಪ್ರಶಂಸೆಗೆ ಪಾತ್ರವಾಗಿ ಅಭಿವದ್ಧಿ ಕನಸು ಕಂಡಿದ್ದ ಕುಂದಾಪುರದ ಬಬ್ಬುಕುದ್ರು ದ್ವೀಪ ಸಂಪರ್ಕ ಸೇತುವೆ ನಿರ್ಮಾಣ ಕೇವಲ ಭರವಸೆಯಾಗಿ ಉಳಿದೀತೆ ಎಂಬ ಪ್ರಶ್ನೆ ಈಗ ಎದುರಾಗಿದೆ. ಕುಂದಾಪುರ ನಗರಕ್ಕೆ ಹೊಂದಿಕೊಂಡಿರುವ ಪಂಚಗಂಗಾವಳಿ ನದಿಯಲ್ಲಿ ಅಡಕವಾಗಿರುವ ಬಬ್ಬುಕುದ್ರು ದ್ವೀಪ ಪ್ರವಾಸಿಗರ ಸ್ವರ್ಗ ಆಗಿರುವ ಮಾತುಗಳು ಕಳೆದ ವರ್ಷ ಜರುಗಿದ ಪಂಚಗಂಗಾವಳಿ ಉತ್ಸವದಲ್ಲಿ ತೇಲಿಬಂದಿತ್ತು. ಈ ನೆಲೆಯಲ್ಲಿ ಬಬ್ಬುಕುದ್ರುವಿಗೆ ಪಯಣಿಸಲು ತಾತ್ಕಾಲಿಕ ಮರದ ಸೇತುವೆ ನಿರ್ಮಾಣ ಕಾರ್ಯ ನಡೆದಿತ್ತು. ಅರ್ಧದಷ್ಟು ಮರದ ಸೇತುವೆ ನಿರ್ಮಾಣ ಕಾರ್ಯ ನಡೆದಿದ್ದರಿಂದ ಬಬ್ಬುಕುದ್ರುವಿಗೆ ಸಾಗುವ ಪ್ರವಾಸಿಗರ ಕನಸಿಗೆ ಹೊಡೆತ ಬಿದ್ದಿತ್ತು. ಪ್ರಸ್ತುತ ಅರ್ಧದಷ್ಟು ಕಟ್ಟಲಾದ ಮರದ ಸೇತುವೆ ನದಿಪಾಲಾಗುತ್ತಿದ್ದರೂ ಕೇಳುವವರಿಲ್ಲ. 

ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದ ದಿ.ಡಾ.ವಿ.ಎಸ್.ಆಚಾರ್ಯ ಬಬ್ಬುಕುದ್ರು ಪ್ರದೇಶಕ್ಕೆ ಭೇಟಿ ನೀಡಿ ಪ್ರವಾಸೋದ್ಯಮ ಇಲಾಖೆಯಿಂದ ಅಭಿವದ್ಧಿಪಡಿಸುವುದಾಗಿ ತಿಳಿಸಿದ ಮೇರೆಗೆ ಪ್ರವಾಸೋದ್ಯಮ ಇಲಾಖಾಧಿಕಾರಿಗಳು ಎರಡೆರಡು ಬಾರಿ ಸಮೀಕ್ಷೆ ನಡೆಸಿ ಹೋಗಿದ್ದರು. ಮುಖ್ಯಮಂತ್ರಿ ಡಿ.ವಿ. ಸದಾನಂದ ಗೌಡರು ಸಹ ಬಬ್ಬುಕುದ್ರುವಿನ ಅಭಿವದ್ಧಿಗೆ ಶ್ರಮಿಸುವುದಾಗಿ ತಿಳಿಸಿದ್ದರು. 

ಪಶ್ಚಿಮ ಘಟ್ಟ ಅಭಿವದ್ಧಿ ನಿಗಮ ಅಧ್ಯಕ್ಷ ಅನಂತ ಹೆಗಡೆ ಆಶೀಸರ ಜೈವಿಕ ಉದ್ಯಾನವನ ಮಾಡುವುದಾಗಿ ಭರವಸೆ ನೀಡಿದ್ದರು. ಆದರೆ ಈ ಎಲ್ಲಾ ಭರವಸೆ ನೀಡಿ ಎರಡು ವರ್ಷ ಸಂದರೂ ಇದುವರೆಗೂ ಯಾವ ಕ್ರಮವನ್ನೂ ಕೈಗೊಳ್ಳದಿರುವುದು ಪ್ರವಾಸಿಗರ ಅಷ್ಟೇ ಅಲ್ಲ ಸಂಜೆ ವಿಹಾರಾರ್ಥಿಗಳಲ್ಲಿ ಅತೀವ ಬೇಸರ ಮೂಡಿಸಿದೆ. 

ಬಬ್ಬುಕುದ್ರುವಿಗೆ ತಾತ್ಕಾಲಿಕ ಸೇತುವೆ ನಿರ್ಮಿಸಿದಾಗಲೇ ಹಲವರು ನಡೆಯಲು, ಕುಳಿತುಕೊಳ್ಳಲು ಆಗಮಿಸುತ್ತಿದ್ದರು. ಈಗ ತಾತ್ಕಾಲಿಕ ಸೇತುವೆ ಏರಲಾಗದಿದ್ದರೂ ಸಂಜೆಯ ಸೂರ್ಯಾಸ್ತಮಾನ ಅಲ್ಲದೆ ಮೋಡದ ಮರೆಯಲ್ಲಿ ಸುಂದರವಾಗಿ ಗೋಚರಿಸುವ ಬಬ್ಬುಕುದ್ರು ದ್ವೀಪವನ್ನು ನೋಡುವುದಕ್ಕಾಗಿ ಜನರು ಬರುತ್ತಿರುತ್ತಾರೆ. 

150 ಲಕ್ಷ ಅಂದಾಜು ವೆಚ್ಚದ ಪ್ರಸ್ತಾವನೆ ಸಲ್ಲಿಕೆ: ಬಬ್ಬುಕುದ್ರು ದ್ವೀಪ ಅಭಿವದ್ಧಿ ಕುರಿತಂತೆ ಸರಕಾರ ಮತ್ತು ಸಂಬಂಧಿಸಿದ ಇಲಾಖೆಗಳ ಸೂಚನೆಯಂತೆ ಪಂಚಗಂಗಾವಳಿ ಸಮಿತಿ 150 ಲಕ್ಷ ರೂಪಾಯಿ ವೆಚ್ಚದ ಪ್ರಸ್ತಾವನೆ ಸಲ್ಲಿಸಿದೆ. ಪ್ರವಾಸೋದ್ಯಮ ಇಲಾಖಾಧಿಕಾರಿಗಳು ಇದಕ್ಕೆ ಒಪ್ಪಿಗೆ ಸೂಚಿಸಿದ್ದರು. 

ಅಭಿವದ್ಧಿ ಬೇಡಿಕೆ 

ಬಬ್ಬುಕುದ್ರುವಿನ ಅಭಿವದ್ಧಿ ಕುರಿತಂತೆ ಪಂಚಗಂಗಾವಳಿ ಸಮಿತಿ ಈಗಾಗಲೆ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. 6 ಅಡಿ ಅಗಲದ ನಡೆ ಸೇತುವೆ, ಬಬ್ಬುಕುದ್ರುವಿನ ಒಳ ಪ್ರದೇಶದಲ್ಲಿ ವಾಕಿಂಗ್ ಟ್ರ್ಯಾಕ್, ಬಯಲು ರಂಗ ಮಂಟಪ, ಎರಡು ಪರಗೋಲ ಹೀಗೆ ಅಭಿವದ್ಧಿ ಚಿಂತನೆ ಪ್ರಸ್ತಾವನೆ ಒಳಗೊಂಡಿದೆ. ಆದರೆ ಇಲಾಖೆ, ಸರಕಾರ ಯಾವುದೇ ಪರಿಕ್ರಮ ತೆಗೆದುಕೊಂಡಿಲ್ಲ ಎಂದು ಪಂಚಗಂಗಾವಳಿ ಉತ್ಸವ ಸಮಿತಿಯ ಬಿ.ಅಪ್ಪಣ್ಣ ಹೆಗ್ಡೆ ತಿಳಿಸಿದ್ದಾರೆ. ಪ್ರವಾಸೋದ್ಯಮ ಅಭಿವದ್ಧಿ ಅಂದ್ರೆ ಕೇವಲ ಹೋಟೆಲ್, ಟೂರಿಸ್ಟ್ ವಾಹನಗಳ ಬಗ್ಗೆ ಗಮನಹರಿಸುವ ಪ್ರವಾಸೋದ್ಯಮ ಇಲಾಖೆ ಕರಾವಳಿಯ ವಿಪುಲ ಪ್ರಾಕತಿಕ ಸಂಪತ್ತಿನ ಅಭಿವದ್ಧಿಗೆ ಮನ ಮಾಡುತ್ತಿಲ್ಲ ಎನ್ನುವುದಕ್ಕೆ ಇದು ಸಾಕ್ಷಿಯಾಗಿದೆ. ಬಬ್ಬುಕುದ್ರು ಅಭಿವದ್ಧಿಯಿಂದ ಇಡಿ ಕುಂದಾಪುರದ ಪ್ರವಾಸೋದ್ಯಮ ಬೆಳೆಯಲಿದೆ